ກ່ອນຕັດສິນໃຈເອົາລູກ ເຈົ້າພ້ອມແລ້ວຫຼືຍັງ ? ຂໍ້ຄິດດີດີ ກ່ອນການເອົາລູກ

ຄິດໃຫ້ດີກ່ອນມີລູກ ຂຽນໂດຍ:  ແອັດມິນ ເພຈ ທີ່ປຶກສາບັນຫາຊີວິດ ຄອບຄົວ ແລະ ຫົວໃຈ

ປີກາຍນີ້ທາງເຮົາໄດ້ຂຽນບົດຄວາມກ່ຽວກັບ ການກຽມພ້ອມກ່ອນແຕ່ງງານມາຝາກກັນ,​ ບາດນີ້ກ້າວຂ້າມມາຮອດຂັ້ນຕອນການເອົາທາຍາດ ຫຼື ເອົາລູກ,  ຫຼາຍຄູ່ທີ່ແຕ່ງກັນໄປ ກະຍັງບໍ່ທັນກ້າເອົາລູກ, ບາງຄົນແຕ່ງປຸບ ເອົາປັບ ບາດແລ້ວເລີກລາກັນ ຫຼື ເສດຖະກິດບໍ່ດີ ເຮັດໃຫ້ລ້ຽງລູກຕາມມີຕາມເກີດ ຫຼື ລຳບາກ.  ບາງຄົນກະບໍ່ຮູ້ຈະກຽມຫຍັງແນ່ໃນການກຽມພ້ອມມີລູກ,  ສະນັ້ນ,​ ມື້ນີ້ທາງແອັດມິນ ເລີຍເອົາຂໍ້ຄິດ ດີດີມາໃຫ້ອ່ານກັນ ເພື່ອຄວາມພ້ອມຂອງເຮົາ.

 1.  ຮັກ ແລະ ເຂົ້າໃຈກັນຫຼາຍພໍ ຫຼື ຍັງ ?

ບາງຄົນແຕ່ງກັນແລ້ວ ກໍ່ເອົາລູກເລີຍ ທັງໆ ທີ່ຄວາມສຳພັນໂຕເອງກະຍັງບຶດດີ ບຶດຮ້າຍ,​ ບາງຄົນຍັງບໍ່ທັນປັບຄວາມເຂົ້າໃຈ ຍັງມີບັນຫາກັນຫຼາຍຢ່າງ ຖ້າເອົາລູກມາແລ້ວລ້ຽງທ່າມກາງບັນຫາແນວນີ້ ລະວັງສົ່ງຜົນໃຫ້ສະພາບຈິດໃຈຂອງລູກເຮົາໄດ້.

2. ມີພະຍາດປະຈຳໂຕຫຼືບໍ່ ?

ພະຍາດບາງຊະນິດ ທີ່ເປັນແລ້ວສົ່ງຜົນຕໍ່ການຖືພາ ແລະ ມີລູກໄດ້, ອາດຈະເປັນອັນຕະລາຍຕໍ່ແມ່ ຫຼື ລູກຂອງຕົນເຊັ່ນ: ໂຣກຫົວໃຈ, ໂຣກ ເບົາຫວານ, ຕັນຊົງ, ພະຍາດຕິດຕໍ່ທາງເພດສຳພັນ,​ ໝາກໄຂ່ຫຼັງ,  ພູມແພ້, ຫອບຫືດ,​ ໂຣກເອດ...  ພະຍາດດັ່ງກ່າວ ຈະສົ່ງຜົນໂດຍກົງຕໍ່ລູກນ້ອຍ,​ ສະນັ້ນຄວນໄປປຶກສາແພດກ່ອນ ເພື່ອປິ່ນປົວ ຫຼື ຫາທາງປ້ອງກັນກ່ອນ.

3. ຄ່າໄຊ້ຈ່າຍທີ່ເພີ່ມຂື້ນ.

ທ້ອນເງິນໄດ້ຊ່ຳໃດລະ ?​ ການມີລູກຈະເພີ່ມຄ່າໃຊ້ຈ່າຍຂື້ນຫຼາຍກວ່າເກົ່າແນ່ນອນ,​ຍັງຈະຄ່າຜ້າອ້ອມ, ຄ່າຢາ,​ ຄ່ານົມ, ຄ່າອາຫານເສີມ, ຄ່າເສື້ອຜ້າ...  ເຮົາຕ້ອງວາງແຜນທ້ອນເງິນດີດີ.

4. ເວລາທີ່ເສຍໄປ.

ຫຼາຍຄົນອາດຈະລື້ງກັບຄວາມໂສດທີ່ເຈິ ເຊັ່ນ: ມີເວລາເບິ່ງໜັງ ຟັງເພງ,​ ນອນໝົດມື້, ໄປເລາະຫຼິ້ນ..​ເວລາເຫຼົ່ານີ້ຈະຫາຍໄປ ເຈົ້າຮັບມັນໄດ້ລະຫວາ ?

5. ຢຸດເລື່ອງກິນເຫຼົ້າ,​ ສູບຢາໄດ້ລະ ?

ຖ້າຜູ້ເປັນຜົວກິນເຫຼົ້າສູບຢາຫຼາຍ ຈະເຮັດໃຫ້ອະສຸຈິບໍ່ແຂງແຮງ, ສົ່ງຜົນໃຫ້ລູກບໍ່ແຂງແຮງນຳ, ນອກນີ້ຍັງມີຜົນວິໃຈບອກວ່າ ເມື່ອຜົວສູບຢາ ແລ້ວເມຍຖືພາຢູ່ໄກ້ຫາຍໃຈເອົາຄວັນຢາສູບເຂົ້າໄປ ຈະເຮັດໃຫ້ມີຜົນຕໍ່ລູກ ເຮັດໃຫ້ມີໂອກາດເກີດກ່ອນກຳນົດ ແລະ ແທ້ງໄດ້ງ່າຍໆ, ນອກນີ້,​ ເລື່ອງດື່ມທາດມຶນເມົາຕ່າງໆ ຍັງສົ່ງຜົນຕໍ່ອະສຸຈິ ແລະ ຮັງໄຂ່ ສົ່ງຜົນໃຫ້ມີລູກຍາກ,  ຜູ້ຍິງຖືພາຖ້າດື່ມທາດມຶນເມົາຫຼາຍ ຈະເຮັດໃຫ້ລູກໂຕນ້ອຍ,​ ເກີດກ່ອນກຳນົດ,​ ມີສະຕິປັນຍາຕ່ຳ,​ ແລະ ພັດທະນາການຊ້າ ເພາະເຊວສະໝອງຖືກທຳລາຍໄດ້ງ່າຍ.

ອ່ານແລ້ວ ກະລຸນາກົດໄລ ກົດແຊ ເພື່ອເປັນກຳລັງໃຈແກ່ພວກເຮົາໃນການຂຽນບົດຄວາມດີດີອອກມາດ້ວຍ.

6. ໄວທີ່ເໝາະສົມ

ບາງຄົນແຕ່ງກັນໄວ ຫຼື ຊ້າ, ແລະ ກະເອົາລູກເລີຍ ແຕ່ຮູ້ຫຼືບໍ່?​ ໄວທີ່ເໝາະສົມແກ່ການເອົາລູກນັ້ນຈະຢູ່ຊ່ວງອາຍຸປະມານ 21-30 ປີ, ແຕ່ຫ້າມກາຍ 35 ປີ. ຍິງ່ອາຍຸແກ່ ຍິ່ງເຮັດໃຫ້ລູກບໍ່ແຂງແຮງ.  ຖ້າອາຍຸບໍ່ຮອດກະເຊັ່ນດຽວກັນ

7. ມີບ່ອນໃຫ້ປຶກສາຫຼືຍັງ ?

ກ່ອນຈະມີລູກຕ້ອງຫາບອ່ນປຶກສາ ຫຼື ຄົນທີ່ປຶກສາ,  ເຊັ່ນມີໝໍດ້ານນີ້ໃຫ້ຄຳປຶກສາ, ຫຼື ຄົນຮູ້ຈັກ ທີ່ມີປະສົບການດ້ານການມີລູກນັ້ນມາໃຫ້ປຶກສາ ແນະນຳເຮົາໃຫ້ຖຶກຕາມຄວາມເໝາະສົມ.

8. ນອນໜ້ອຍລົງ.

ໃຜທີ່ມີລູກນ້ອຍອາດຈະຮູ້ດີ, ສະນັ້ນເຮົາຄວນເຜື່ອໃຈໄວ້ເລີຍ,  ເວລາລູກແອ່ວ ລູກໃຫ້ຍາມກາງຄືນ, ຕ້ອງໄດ້ຕື່ນມາ,  ເວລາລູກສະບາຍກະຕ້ອງໄດ້ເບິ່ງແຍງດູແລະ ອົດຫຼັບອົດນອນ.

9. ພາລະເພີ່ມຂື້ນ.

ເວລາທີ່ລູກບໍ່ເປັນຫຍັງຍັງມີພາລະຫຼາຍລະ ໂດຍສະເພາະ ພໍ່ແມ່ ຜູ້ທີ່ມີວຽກປະຈຳແຮ່ງໜັກເລີຍ ບາງມື້ບໍ່ໄດ້ນອນ ຍັງຕ້ອງຕື່ນເຊົ້າເອົານົມໃຫ້ລູກແລ້ວ ຕ້ອງໄປວຽກໝົດມື້ອີກ,​ ຕອນສວາຍກະຕ້ອງໄດ້ຫຼົບມາເບິ່ງລູກ ບາງມື້ລູກບໍ່ສະບາຍແຮ່ງໜັກ.

10. ຄວນມີຄວາມຮອບຄອບຫຼາຍຂື້ນ.

ຕ້ອງໃສ່ໃຈກັບເລື່ອງແບບນີ້, ຕົວຢ່າງເຊັ່ນ:  ສອງເດືອນທຳອິດບໍ່ຄວນພາລູກນ້ອຍອອກໄປນອກເຮືອນ,  ໄປທ່ຽວ, ເພາະລູກນ້ອຍຍັງບໍ່ມີພູມຕ້ານທານ,  ຫາກໃຜເປັນຫວັດກໍ່ບໍ່ຄວນມາໄກ້ລູກ ເພາະລູກຈະຕິດໄດ້ງ່າຍ,  ເວລາເປັນຫຍັງ ກະຫ້າມຊື້ຢາມາໃຫ້ລູກກິນເອງ.

11. ເລືຶ່ອງຂອງການໃຊ້ຢາ.

ເວລາທີ່ຖືພາ ເປັນຫຍັງກະບໍ່ຄວນກິນຢາເອງເດັດຂາດ ຕ້ອງໄປປຶກສາໝໍກ່ອນ,​ ເພາະຢາຫຼາຍຊະນິດ ກະບໍ່ເໝາະສຳລັບຄົນຖືພາ ສະນັ້ນມີຫຍັງກະຄວນໄປຫາໝໍຈະດີທີ່ສຸດ.

ມີບັນຫາຫຍັງ ຄິດບໍ່ອອກ ສາມາດປຶກສາໄດ້ທີ່ ທີ່ປຶກສາ ບັນຫາຊີວິດ ຄອບຄົວ ແລະ ຫົວໃຈ

12.  ສັດລ້ຽງ.

ສຳລັບຄົນທີ່ລ້ຽງສັດໃນເຮືອນ ຕັ້ງແຕ່ລູກເກີດ ຫາອາຍຸ 6 ປີ ຄວນຄຳນຶງເຖິງສັດລ້ຽງຕ່າງໆ ອາດຈະເຮັດໃຫ້ລູກແພ້,​ ແລະ ເວລາປ່ອຍສັດລ້ຽງໄວ້ນຳລູກນ້ອຍນັ້ນ ອັນຕະລາຍເປັນຢ່າງຍິ່ງ ຄວນເບິ່ງດີດີ.

13. ໂລກທີ່ປ່ຽນໄປ.

ຈາກທີ່ທັງສອງເລີຍໃຊ້ຊີວິດແບບສະບາຍສະບາຍ,​ ຫຼິ້ນໂຊຊ່ຽວ,  ຫຼິ້ນໂທລະສັບ, ມັກໄປຫຼິ້ນໄປທ່ຽວນອກບ້ານ,  ຈາກທີ່ສົນໃຈເລື່ອງອື່ນໆ ກໍ່ຕ້ອງມາສົນໃຈອ່ານເລື່ອງລູກແທນ,  ແລະ ແລກກັບຄວາມລຳບາກ ເຮົາກະໄດ້ເຫັນໂລກໃບນ້ອຍໆ ສາຍເລືອດຂອງເຮົາກຳລັງຮຽນຮູ້ ແລະ ເຕີບໃຫ່ຍໄປເລື້ອຍໆ ພຶດຕິກຳຂອງເຮົາກໍ່ຈະປ່ຽນໄປອີກແບບໜຶ່ງເລີຍ.

ທັງໝົດເປັນສິ່ງທີ່ແອັດມິນລວມມາຝາກ ອາດຈະມີອີກຫຼາຍໆຂໍ້ກ່ວານີ້,​  ແຕ່ຄືເວົ້າໄປ ແລກກັບຄວາມລຳບາກ ເຮົາຈະໄດ້ເຫັນໂລກໃບນ້ອຍໆ ທີ່ອອກມາຈາກເລືອດ ແລະ DNA ຂອງເຮົາກຳລັງຮຽນຮູ້ ແລະ ເຕີບໃຫ່ຍຂື້ນ ຈະເຮັດໃຫ້ເຮົາເຊົາເມື່ອຍຂື້ນມາທັນທີ,​ ຮອດເວລານັ້ນ ເຮົາຈະພູມໃຈສຸດໆ ຄອບຄົວ ຈະອົບອຸ່ນຂື້ນມາທັນທີ,  ເວລາທີ່ໄປເຮັດວຽກກໍ່ຈະຄິດຮອດໃບໜ້ານ້ອຍໆທີ່ໜ້າຮັກຂອງລູກເຮົາເອງ.

ຂອບໃຈທີ່ອ່ານ

ແອັດມິນທີ່ປຶກສາ ບັນຫາຊີວີິດ ຄອບຄົວ ແລະ ຫົວໃຈ