ອັບເດດໄອທີ: Huawei ເປີດໂຕ Kirin 990 ຊິບຂະໜາດ 7nm ແລະ ມີໂມເດັບ 5G ໃນໂຕ

ເອີ້ນໄດ້ວ່າເປັນຍຸກ 5G ທີ່ມີການແຂ່ງຂັນກັນສູງຫຼາຍ, ເພາະເທັກໂນໂລຊີຕ່າງໆທີ່ເປີດໂຕໃໝ່ຖ້າບໍ່ມີ 5G ຖືວ່າອາດຈະຕົກຍຸກ ຫຼື ບໍ່ໄດ້ຮັບຄວາມສົນໃຈໄດ້ ຕ້ອງຕິດຕາມເບິ່ງວ່າຕໍ່ຈາກນີ້ແຕ່ລະຄ້າຍຈະເອົາຫັຍງອອກມາງັດກັນອີກແນ່,  ແລະ ຫົວເວີ່ຍກໍ່ບໍ່ພາດ ເປີດໂຕ CPU Kirin 990 ທີ່ມາພ້ອມກັບ ໂມເດັມ 5G ໃນໂຕລຸ້ນທຳອິດຂອງໂລກ.

Kirin 990 ເປັນຊິບທີ່ຫົວເວີຍພັດທະນາ ແລະ ຜະລິດຂື້ນມາເອງ ໂດຍຊິບດັ່ງກ່າວມີຂະໜາດ 7 ນາໂນແມັດ, ມີ GPU ແລະ NPU ລຸ້ນອັບເກຣດຈາກ Kirin 980 ພໍສົມຄວນ, ໂດຍສະເພາະການບໍລິຫານຈັດການເລື່ອງການໃຊ້ພະລັງງານໄດ້ຫຼາຍ, ແລະ ມີ AI ທີ່ເຂົ້າມາຈັດການການໃຊ້ພະລັງງານໃນ Kirin 990 5G ນັ້ນທຽບເທົ່າກັບ Kirin 980 ທີ່ເຊື່ອມຕໍ່ລະບົບ 4G ໝາຍຄວາມວ່າ ທຳມະດາແລ້ວໃຊ້ງານ 5G ຈະຕ້ອງໃຊ້ພະລັງງານຫຼາຍກວ່າ 4G ແນ່ນອນ,  ແຕ່ຊິບໂຕນີ້ພັດໃຊ້ພະລັງງານຊ່ຳເກົ່າ.

Kirin 990 ຫົວເວີ່ຍຢືນຢັນວ່າ ມີປະສິດທິພາບການເຮັດວຽກແບບ Single-core ດີກວ່າຊິບ Snapdragon 855 ເຖິງ 10% ແລະ ມີແຜງວົງຈອນ PCB ທີ່ນ້ອຍກວ່າເກົ່າເຖິງ 36% ເນື່ອງຈາກວ່າມັນບໍ່ຈຳເປັນໃຊ້ງານຮ່ວມກັບໂມເດັມແຍກ,  ນອກນີ້ ຊິບດັ່ງກ່າວຍັງເປັນລຸ້ນທຳອິດຂອງໂລກທີ່ມີ Transistor ຈຳນວນຫຼາຍກວ່າ ໝຶ່ນລ້ານໂຕອີກດ້ວຍ.

Kirin 990 ໂມເດັມ 5G ໃນໂຕສາມາດເຮັດຄວາມໄວໃນການດາວໂຫຼດໄດ້ສູງຮອດ 2.3 Gbps/1.25 Gbps ຖ້າທຽບກັບໂມເດັມແຍກ Snapdragon X55 ຖືວ່າເປັນຮອງສົມຄວນເພາະ ໂມເດັມແຍກຂອງຄ້າຍນັ້ນເຮັດໃດ້ເຖິງ 7Gbps/3Gbps. ນອກຈາກນີ້ Kirin 990 ຍັງມີລຸ້ນທຳມະດາສຳລັບມືຖືທີ່ບໍ່ຮອງຮັບ 5G.

Kirin 990  ຍັງປັບປຸງເລື່ອງຄວາມສາມາດໃນການຖ່າຍພາບ, ວີດີໂອ ໂດຍຫົວເວີຍບອກວ່າ ສາມາດຈັດການເລື່ອງ Noise ໄດ້ລະດັບກ້ອງ DSLR ເລີຍວ່າຊັ້ນ.

Kirin 990 ຈະມາພ້ອມກັບມືຖືລຸ່ນ Mate 30 ທີ່ກຳລັງຈະເປີດໂຕໃນວັນທີ 19 ກັນຍາ 2019 ນີ້.

 

ແຫຼ່ງຂ່າວຈາກ: Engadget